সুৰভি বৰ পাত্ৰ গোহাঁই
শিৱসাগৰ
সেইজাক বলীয়া বতাহ
ঘোপমৰা আন্ধাৰত বলে
বেলিপকা দুপৰীয়াৰ বেসুৰা গান,
আত্মীক বান্ধোন উটি যায় বা লাগি
তেজৰ বলীয়া বানত
ঢৌৱে ঢৌৱে লুপ্তপ্ৰায় হৃদয়ৰ তান ।
দুচকুত ভাঁহি উঠে
এসাগৰ নীলা মদিৰা
বাসনাৰ হেঁদালিত ওলমি ৰয়
ঔফুলীয়া সপোন এটা ।
হাতৰ মুঠিত চালিত সময়
কামৰ কান্ধত টিলিঙা লগাই
বিজয়ৰ চিলা উৰুৱাই,
ঘৰচিৰিকাৰ খোজত উদ্দাম সংগীতৰ লহৰ ।
এইয়া পৃথিৱী সংকুচিত কৰা নে
জীৱনৰ বাট দীঘল নে চুটি কৰাৰ আখৰা
এতিয়া আৰু কোনে কাক সোধে
কোন কাৰ সহোদৰ ?
